07 Aug 2024

Morafe wa Loporung o akgoletswe mowa wa boipelego. 

Fa a tlanyatlanyetsa bagolwane ba Lephata la Temo-Thuo le ba bangwe ka loeto kwa go lekola kgokelo ya terata ya taolo matlhoko le motsamao ya leruo mo letshitshing la noka ya Molopo, Dr Jaone Sebina o ne a itumelela tema e e setseng e segilwe. 

Dr Sebina, yo e leng molomaganyi mo go tsa taolo botlhoko jwa tlhako le molomo mo kgaolong ya Borwa, o boleletse boeteledipele gore banni ba Loporung ba supile keletso ya bone ya go bereka le puso fa esale tiro e simolola. 

A re fa lephata le simolola go aga terata go kganela diruiwa go tlola melelwane ya Botswana le Afrika Borwa, banni bone ba ne ba setse ba gatetse pele, a tlatsa ka go re, ka nako e ba neng ba simolola go epa didiba, morafe  o ne o setse o ithaopile go reka ditsompelo tsa kago le ya raseboa le mekoro e e nosetsang leruo. 

A re le fa go ntse jalo ba ne ba emisetsa ditsompelo tseo, a tlatsa ka go re ba ntse ba bereka sentle le bontsi jwa merafe e e iphaphathileng ka letshitshi la noka ya Molopo. 

Fa a ntsha la gagwe, Kgosi Lebogang Mosii wa Loporung o boletse fa a itumeletse se puso e se ba diretseng ka go aga terata ya taolo mesepele ya leruo le go thusa ka didiba tse di nosang leruo. A re fa e sale terata e agwa, bogodu jwa leruo bo bepile. 

“Leruo la rona le ne le nna hela ka kwa South Africa ka gore le ne le bona metsi koo le be le kopana le dirukutlhi, mme fa e sale go agwa terata, dikgang tseo di okobetse,” ga bua kgosi. Kgosi Mosii o ne a kopa bagolwane ba lephata go akofela go rola sediba ka gore leruo ga le na kwa le nwang teng. Bagolwane ba bangwe ba ne ba akgela ka go re go botlhokwa gore banni ba lemoge botlhokwa jwa terata. 

Ba re terata le sediba di tlhokomelwe gore di seka tsa senyakakwa ka e le tsone di tlaa ba jesang. Morafe  o ne wa ntsha matshwenyego a gore go le gantsi terata e senngwa ke banni ba Afrika Borwa, ba re le fa ba tlaleya dikgang tseo, badira molato ga ba ke ba sekisiwa. 

Ba re jaanong ke nako gore mebuso ka bobedi e tshwaraganele tlhokomelo ya terata gore e itshwarelele. Modulasetilo wa sediba sa morafe wa Loporung Rre Edison Sesike a re le fa ba ne ba le kgatlhanong le go agwa ga terata, jaanong ba lemoga botlhokwa jwa yone ka e dira ditiro tse pedi tsa go kganela bogodu jwa go tlodisa leruo le dithoto melelwane. BOKHUTLO