07 Aug 2024

 Go simolodisiwa ga difalana tse disha kwa Pandamatenga ke kgothatso mo baleming ba kgaolo ya Chobe gore ba simolola go sola masimo a bone molemo ba oketsa thobo dijo di tle di nne teng.

Mopalamente wa Chobe, Motlotlegi Machana Shamukuni o buile jaana bosheng, a re balemi jaanong ga ba na lebaka la go tlhoka go dira go bonala ka jaana puso e tlhomile mabolokelo a thobo a maemo a a kwa godimo. Puso, ka lekalana la Special Economic Zone Authority (SEZA), e agile difalana di le lesome le bobedi go oketsa tse di ntseng di le teng go nna lesome le boferabobedi mme di na le mothama wa 60 000 metric tonnes.

Rre Shamukuni, yo e bileng e le tona wa Tshiamelo, o ne a bua jaana bosheng kwa pulong ya difalana, a re di agilwe ka jaana balemi ba ne ba ngongoregela gore tse di leng teng di dinnye ga di na mothama. 

O akgoletse puso go tsibogela dilelo tsa balemi.

Mo godimo ga moo o itumeletse gore difalana tseo ga di na go solwa molemo ke balemi fela, mme di tlaa dirisediwa ditiro tsa go tlhabolola seemo sa dijo. 

Rre Shamukuni a re ke keletso ya puso go bona dikoloi tsa megobagoba di rora dijo di di isa kwa mafatsheng a mangwe.

A re dikoloi tsa megobagoba tse di tswang Afrika Borwa di feta ka Pandamatenga di isa dijo kwa Democratic of Republic of Congo le Zambia ga mmogo le mafatshe a mangwe bo borwa jwa Afrika.

Rre Shamukuni o kgothaditse badira-le-tsa temo-thuo go bereka ba le seopo sengwe go netefatsa gore difalana di ntsha maduo.

Maikaelelo ke go nonotsha Batswana go ikemela le go tokafatsa matshelo a bone, Rre Shamukuni a tlhalosa.

Tona wa Kgwebo le Madirelo, Motlotlegi Mmusi Kgafela o ne a leboga lekgotla la kabo ditsha la Chobe go bo le ntshitse setsha gore go agwe difalana, a re Pandamatenga e segilwe e le nngwe ya mafelo a a faphegileng go direla kgwebo (special economic zones) gore go godisiwa itsholelo le go nonotsha Batswana go tsena ma temo-thuong, ba fepe setshaba ba bo ba rekise mo go setseng.

Go ne go begilwe fa lekgotla la kabo ditsha le ntshitse diekere di le 97 000 tsa lefatshe mme tse 45 000 tsa tsone di dirisiwa ke ba ba gwebang ka temo.

Rre Kgafela a re o solofela fa difalana di tlaa kgontsha gore go rojwe se se botoka mo masimong ao. facilitate more agro- production from the farms.

A re tiro eo ke nngwe ya tse puso e di solofeditsweng Batswana go netefatsa gore temo-thuo le go godisa itsholelo. BOKHUTLO