06 Aug 2024

Dipatlisiso mo go tsa maranyane di botlhokwa ka di dira gore batho ba tlhabolole dikitso tse ba nang le tsone mo go ka fetlhang diphatlha tsa mebereko le go itshetsa.

Motshwarelela mogokgo wa sekole sa Botswana Wildlife Training Institute Mme Omphile Samapodisa o buile jaana kwa Gumare kwa tshimolodisong ya beke ya maranyane ka Mosupologo.

O bile a kgothatsa banni ba Gumare go dirisa dipatlisiso le maranyane go tlhabolola matshelo a bone.

Mme Samapodisa o tlhalositse fa boranyane bo tswa kgakala e le ntlha nngwe ya botshelo jwa Motswana.

A re go dira didirisiwa ka matlalo le dikgong jaaka ditilo, mabante ke mokgwa mongwe wa tiriso ya maranyane ka go dirisiwa metswako mengwe go tokafatsa boleng jwa didirisiwa tsa go nna jalo. 

Ka jalo a re Batswana ba rotloetsege go dirisa maranyane a bogologolo le a segompieno go akola di-tsa tlholego.

Beke ya maranyane e tshwarwa mo kgweding ya Phatwe ngwaga le ngwaga.Mme Samapodisa a re e le ba Lephata la Diphologolo le Tshomarelo Di-tsa Tlholego, ba dirisa beke eo go tsibosa setshaba ka maele a ba ka a dirisang go tswa ka mebereko ka go dirisa maranyane le botsipa.

Kgosi Moitshepi Molelwa wa Gumare a lebogile sekole sa tsa diphologolo le tsa tlholego go tshwarela letsatsi leo kwa Gumare le go tsibosa banni ka tsa maranyane. 

Kgosi Molelwa o ne gape a re seo ke monyetla wa gore morafe wa Gumare o itshwaraganye le lephata la diphologolo mo bekeng eo ya maranyane ka jaana Gumare a angwa ke dikgwetlho tsa kgotlhang ya batho le diphologolo. BOKHUTLO