06 Aug 2024

Puso e rotloetsa tiriso ya maranyane ke ka jalo Lephata la Banana, Bong, Metshameko le Ngwao ka Lephata la Metlobo ya Dibuka ba nang le lenaneo la go ruta Batswana maranyane.

Se se builwe ke Mogolwane wa Lephata la Banana, Bong,  Metshameko le Ngwao wa kgaolo ya Palapye, Rre Mpilo Mbo kwa moletlong wa kaloso ya baithuti ba tsa maranyane ba le masome mararo le boferabobedi kwa Palapye bosheng.

Dithuto tse tsa sebaka sa dikgwedi tse tharo di ne di tsenwe ke banana le bagolo go tswa Palapye, Topisi, Tamasane le metse e mengwe ya kgaolo ya Palapye.

Rre Mbo a re puso e itlamile go netefatsa gore Batswana botlhe ba nna le dikitso tsa maranyane a tlhaeletsanyo.

A re lenaneo le ke lengwe la a a beilweng kwa pele mo lenaneong la ga Motlotlegi Tautona Dr Mokgweetsi Eric Keabetswe Masisi la Tlhomo Ntsha.

Rre Mbo a re malatsi a go thata go dira sepe fela fa o sena dikitso tsa maranyane, bogolo jang mo go thuseng setshaba mo go tsa tiro le tsa botshelo ka kakaretso.

A re malatsi ano go ntse go tsweletse go nna motlhofo go bona kgokelo ya maranyane gongwe le gongwe mo lefatsheng leno.

O ne a kgothatsa baithuti ba ba neng ba aloga gore ba seka ba salela morago mme ba tsweledise dithuto tse ba di filweng ga mmogo le go di dirisa go tokafatsa matshelo a bone.

Mr Mbo o akgoletse Lephata la Metlobo ya Dibuka go rulaganya dithuto tse le go bo ba kgonne go fenya dikgwetlho ka jaana go ne go se motlhofo.

Mogolwane wa Lephata la Metlobo ya dibuka kwa Palapye, Mme Peggy Ntshole o akgoletse dialogane boineelo, bopelotelele le katlego ya bone.

Mme Ntshole a re le fa go ne go se bonolo, bangwe ba tlogetse mo tseleng, o lebogela gore ba kgonne go wetsa le go dira sentle mo dithutong tsa bone.

O ba kgothaditse gore ba ye go dirisa dithuto tseo go batla tiro le go tsweledisa dithuto tse go ya fa legatong le lengwe.

Mme Ntshole a re dithuto tse di botlhokwa, a tlhalosa fa go na le bopaki jwa gore bangwe ba bone ditiro ka setlanka sa dithuto tse a ba a ba rotloetsa gore ba ye go se dirisa e seng go se boloka mo matlong.

O bile a ba kgothatsa gore jaaka ba weditse dithuto tse ba ya go tsena mo dikgwetlhong tsa botshelo mme ba nne le maikaelelo, maitlamo le boitsholo jo bo siameng gore ba fenye dikgwetlho.

Mongwe wa barutintshi ba dithuto tsa maranyane, Rre Phineas Fane o lebogile dialogane go bo di kgonne go wetsa dithuto, a tlhalosa gore kwa tshimologong ba ne ba le masome matlhano mme go kgonne ba le masome mararo le boferabobedi fela.

Rre Fana o ba gakolotse gore ba tsweledise dithuto ka jaana tse ba di dirileng e le tshimologo fela.

O ba rotloeditse gore nako tsotlhe fa ba bona mananeo a a sa lopeng madi ba le aramele le santse le tlhabile. A re le thusa go ntsha banana mo mekgwatheng.

Mongwe wa dialogane Rre Dimpho Olekanye yo e leng rakgwebo wa Khamphani ya tsa itshireletso o supile fa dithuto tse di le botlhokwa.

A re o ne a dirisa khompiutara mo tirong ya gagwe, a tlhalosa fa dithuto tse di mo lemotshitse gore o ne a sena kitso gotlhelele ya khompiutara.

A re mo nakong eno o tlhaloganya khompiutara, a leboga puso ka lenaneo le, a bo a kgothatsa dialogane ka ene gore ba dirise dithuto tse ba seka ba di tsaya motlhofo.

Rre Olekanye, yo o neng a tsenye dithuto tse le babereki bangwe ba gagwe, a re o rotloetsa Batswana go dirisa lenaneo le la mahala go tokafatsa kitso ya bone ya maranyane.

Mme Ketshephileone Samuel le Mme Boipelo Matshoba ba ba gaisitse baithuti ba bangwe. BOKHUTLO