22 Jul 2024

 Lebelo lwa BotswanaLife Classic national half marathon go tlhalosiwa fa le godile monongwaga.

Se se builwe ke morulaganyi wa lebelo le Mme Tebogo Keepetswe, yo gape e leng mogolwane kwa BIHL.

Mme Keepetswe a re pele ga COVID-19, lebelo le ne le gatisa batabogi ba ka tshwara 750 mme palo eo e godile mono ngwaga ka go ngoka batabogi ba le 1 250 mo dikarolong tse tharo tse di neng di akaretsa lebele lwa banyana, lwa 21.1km le lwa 10km, ka Tshipi.

A re ba nnile le thotloetso e tona go tswa kwa go ba sepodisi sa Botswana le mokgatho wa Botswana Athletics Association.

A re ba itumeletse batsaya karolo go tswa kwa South Africa, Zimbabwe, le Kenya mme a supa fa bontsi bo ne bo tswa mo gae.

O kgothaditse Batswana go tswelela ba itlhokomela kgatlhanong le malswetse a a sa tshelanweng a supa fa seo, e le lengwe la lebaka la go tshwara lebelo le. A re maikaelelo a mangwe ke go gakolola setshaba ka botsogo jo bo siameng, go itshidila le go ja sentle, dilo tse di ka thusang go oketsa botshelo jwa motho.

Rre Ebel Chibanda o ne a fenya mo letlhakoreng la borre la 21.1km fa Mme Boikhutso Bakha a ne a itlhoma kwa pele mo go bomme.

Rre Sylvester Koko ò ne a fenya borre mo 10km fa Mme Mosadikwena Gotswakgosi a ne a fenya bomme. Bafenyi ba 21.1km ba gapile P20 000 fa ba 10km ba gapile P10 000. BOKHULO