17 Jun 2024

Dikgosi tsa Mmadinare, Robelela le Tobane di ntshitse matshwenyego ka batho ba ba epang motlhaba kwa nokeng ya Motloutse.

Se, se tla morago ga thuto seka dipuisanyo e e neng e diretswe dikgosi le badulasetilo ba metse e e welang ka fa tlase ga lephata la kabo ditsha la Mmadinare.

Maikaelelo magolo a thuto seka dipuisanyo e ne e le go amogana maele ka dikgang tsa tikologo ka e le bone baanelwa bagolo mo tsamaisong le merero ya lefatshe.

Kgosi Tlhako Motlhasedi go tswa Tobane o tlhalositse fa matshelo a batho ba Tobane a ikaegile thata ka noka ya Motloutse ka e le gone kwa ba nosang leruo teng.

Kgosi Motlhasedi o tlhalositse fa ba tswa kgakala ba ikuela kwa go ba lephata la tshomarelo tikologo ka go tlhoka go epa motlhaba ka kelelelo mo go setseng go babaletse noka. 

O tlhalositse fa noka e sa tlhole e tshwara metsi lebaka le leleele mme se se babaletse ditlhare le diphologololo tse di tshelang mo nokeng.

Kgosi Motlhasedi o tlhalositse fa a tshwenngwa ke go bo batho ba ba neetsweng boikarabelo jwa go aba diteseletso tsa go epa motlhaba ba sa latedise gore a go tsewa motlhaba ka fa go dumalanweng ka teng mo teseletsong.

A re barui ba Tobane ba ne ba itiretse masaka a ba nosang kwa go o ne mme a setse a wetse ka lebaka la go epa noka go fetisa seelo se se beilweng.

O tlhalositse fa barui ba le mmalwa ba setse ba latlhegetse ke leruo ka ba ba epang motlhaba ba tlogela mahuti a a bakang gore leruo le wele mo teng. A re o tlhaloganya gore bangwe ba itshetsa ka go epa motlhaba mme keletso ke gore o epiwe ka kelelelo jaaka teseletso e rebola.

Kgosi Motlhasedi o tlhalositse fa morero go tswa kwa maphateng a a maleba o santse o tlhaela mme ke ka moo morafe o nnang le dipelaelo tsa gore batho ba ba epang motlhaba baabo ba sena diteseletso, mme a kopa gore e re fa gona le mongwe yo o neetsweng go dira tiro ya go nna jalo, a itshupe kwa morafeng gore e re a sa dire sentle go nne le kwa ba ka mmonang teng.

Kgosi Galeage Hollard wa Mmadinare le e ne o ne a kopa ba maphata a a neetsweng boikarabelo jwa go tlhokomela dinoka go nna ba sekaseka gore motlhaba o teng pele ba neela batho diteseletso.

Kgosi Hollard a re go tlhoka morero le morafe go dira gore e nne o kare dikgosi ga di na boikarabelo ka go le gantsi ba sena dikarabo tse ba ka di neelang morafe.

E rile a tswa la gagwe, Rre Kgotla Phale go tswa kwa go ba lephata la tshomarelo tikologo, a tlhalosa fa ba itse ka selelo sa magosi mabapi le kepo e e sa babalesegang ya kawa nokeng ya Motloutse.

Rre Phale o tlhalositse fa maikarabelo a bone e se go aba diteseletso tsa kepo ya motlhaba mme ba itebagantse le go tlhomamisa gore tikologo ga e kgotlelesege.

A re e le ba lephata la tshomarelo tikologo, tiro ya bone ke go tlhomamisa gore tiro e e dirwang ga e babalele tikologo le go ama batho ba ba mo tikologong ya go nna jaana.

O kaile fa go na le melawana e e tlhalosang gore motlhaba o tshwanetse go tsewa jang, a re mo o fitlhelang go epilwe noka go felela go e bolaya boleng. Bokhutlo