11 Jun 2024

Monna mongwe wa Tsabong o mo diatleng tsa mapodisi go ba thusa ka ditlhotlhomisong morago ga go fitlhelwa ka dinama mo setsidifatsing kwa ga gagwe, tse go belaesegang e le tsa phologolo.

Mookamela mapodisi a Tsabong, Superintendent Christopher David o tlhalositse mo potsolotsong ka Mosupologo, gore mapodisi a tshegeditse monna wa dingwaga tse di masome a mane le bobedi mabapi le bogodu jwa diphologolo morago ga go longwa tsebe ke mongwe kgwedi eno e tlhola malatsi a supa.

Superintendent David o boletse fa ba tshegeditse monna yoo, go ba thusa mo ditlhotlhomisong fa ba sa ntse ba le mo patlong  ya banna ba le babedi ba ba ineileng naga, ba go belaelwang  ba ne ba le mmogo mo borukutlhing jo. O boletse fa dinama tseo, di  tlaa go tlhatlhobiwa go netefatsa  gore ke tsa phologolo e fe. 

Superintendent David o supile fa e tlaare mo bogaufing, mmelaelwa a isiwe fa pele ga lekgotla la ga mmakaseterata kwa Tsabong go ya go arabela molato. A re go belaesega fa dilalome tse di utswang diphologolo di setse ba dira e le kgwebo, selo se a tlhagisang setshaba go ikgapha mo go rekeng nama e e sa tlhatlhobiwang ka ba tshwanetse go reka kwa marekisetsong a a nang le setlankana se se letlang go  rekisa nama. Mookamela mapodisi a Tsabong o ne a gakolola botlhe ba ba ganyaolang diphologolo go emisa go dira jalo ka diphologolo e le tsone teemane ya lefatshe leno ka di oka bajanala selo se se thusang thata mo kgodisong ya itsholelo.  BOKHUTLO