17 Jan 2019

Modulasetilo wa komiti ya ditlhabololo tsa Ditladi a re go tlhoka kgosi go diga seriti sa motse ebile go ama ditirelo tsa komiti ya motse oo.

Rre Keobapotse Modise o ne a bua mo potsolotsong bosheng.

A re fa e sa le go wela ga go busa ga ga Mme Gaobodiwe Gabanamotse yo o neng a tshwareletse bogosi ka 2017, seemo sa ditlhabololo ga se jese diwelang.

“Go na le mekwalo mengwe ee tlhokang kgosi go e baya monwana, mme tiro eo e felela e dirwa ke kgosana.  Mme kwa pele re palelwe ke go thusiwa lebaka e le gore go batla monwana wa ga kgosi eseng kgosana,” a tlhalosa.

Rre Modise o ne a tlhalosa fa ditirelo tse di akaretsang tsamaiso ya ditsheko di tlhoka kgosi, ka jalo ba patelesega go kopa dikgosi go tswa kwa ntle go tla go tsamaisa ditsheko.

A re seemo se se dira gore dikgang di tsee nako e e telele go rarabololwa ka jaana dikgosi tse di kopiwang di a bo di tshwerwe ke tiro kwa dikgotleng tsa bone.

E re ka Setswana se re naga e senang khudutlou bo lobeto ba ipha naga, Rre Modise a re bo seong jwa kgosi bo rotloetsa botlhoka tsebe mo motseng, bogolo jang bogodu jwa leruo.

O ne a tlhalosa gore motse o senang kgosi ga o ke o robalelwa ke ditlhokwa ka jalo ba eletsa gore ba ba maleba ba potlakele go rarabolola kgang ya bogosi jwa Ditladi. BOKHUTLO