16 Jan 2019

Setlhopha sa mmino wa setso sa Malau se tlhametswe go ipelafatsa ka koma.

Se tlhamilwe ke ditswerere tsa mmino wa setso; Gaone Kgatsele le Nkatlang Maikano.

Rre Kgatsele, yo o tlwaelesegileng ka leina la Kgagaripa, mo go tsa kopelo o boletse fa ba ipelafatsa ka dikoma le go rekisa Botswana kwa mafatsheng a sele.

A re maikaelelo a mangwe ke go rotloetsa tiriso ya teme ya Setswana, a tlatsa ka gore ba batla go nna sekao mo bananeng ba bangwe.

Kgagaripa o buile gore ba batla go kaela banana gore kopelo e ka tlodisa motho melatswana.

“E rile re sena go ikopanya, ra dira melawana e e tla re thusang go diragatsa maikaelelo a rona, melawana e, gompieno re gatetse pele ka ntlha ya yone ebile re setse re gatisitse album ya ntlha e e bitswang Sentlaga sa puo e e nang le dipina di le thataro.

Dipina tsa yone ke Malau-Legae, Galaxy, Jobe, Dibareng, Sentlagara sa puo le Tladi o bola motho,” a tshwaela. 

A re pele ga ba tlhama dipina tse, ba ne ba nna fa fatshe go bona gore ba ka ntsha dipina tsa mofuta ofe tse di ka solegelang Batswana molemo. 

A re pinagare ya album ya bone; Sentlaga sa puo e bua ka fa borre ba rontshiwang ditshwanelo tsa go tlhokomela bana ka teng.

O tlhalositse gore ba tlhamile pina e fa bangwe ba ditsala tsa bone tsa borre ba ne ba lela sa mmaiyoo mabapi le tlhokomelo ya bana.

Kgagaripa a re go le gantsi borre ba ba rontshiwang tshwanelo ya go bona bana ba bone ke ba nang le itsholelo e e kwa tlase, a tlhalosa gore pina ya bone e rotloetsa bomme, batsadi le borre go itse fa botshelo e le leoto la koloi bo dikologa ebile gape rre mongwe le mongwe a na le tshwanelo ya go bona ngwana wa gagwe ntle le gore o tshela botshelo jwa mofuta mang.

A re dipina tsa bone di reediwa ke mongwe le mongwe, ngwana kana mogolo ka ba dirisa Setswana se se lolameng ebile gape se kgatlha.

A re ba lemoga fa setlhopha sa malau se gola ka ba laleditswe go diragatsa kwa South Africa kwa moletlong wa 1st Annual Ratlou Cultural show le kwa Merwalo e thata Puo phaa cultural festival ka kgwedi ya Moranang. BOKHUTLO