07 Jan 2018

Batswana ba kopilwe go tsosolosa ngwao.

Kopo e e dirilwe ke mopalamente wa Nkange, Rre Edwin Batshu fa a ne a bula semmuso letsatsi la dikgaisano tsa mmino wa Setswana le dipina tsa dinnoto kwa Tutume bosheng.

Rre Batshu a re Tautona wa pele, Sir Seretse Khama o rile setshaba se se senang ngwao ke moka se suleng, ka jalo se ba se dirang ke go ribolola ngwao.

O gwetlhile morotloetsi wa dikgaisano tseo, Rre Edward Totego go diragatsa toro ya gagwe le go bona ngwao e godile e dirile pharologanyo mo bathong.

O ne gape a leboga tshwaragano ya mekgatlho e e farologanyeng mo Tutume, a re tiro e ba e dirang e tona thata ka le ba ba santseng ba saletse kwa morago ba tlaa tsaya malebela mo go bone.

Fa a tswa la gagwe, Rre Totego a re ba simolotse dikgaisano tseo tsa mmino wa Setswana e le ditlhopha tsa kgotla ya Selolwane fela mme ya re ba ntse ba tsweletse ba bona go tshwanela go akaretsa ditlhopha tsa dikgotla tse dingwe tsa Tutume.

Rre Totego a re o ne a gwetlhilwe ke go bona batho ba latlhile dingwao tsa bone ba sia le dingwao tsa ditshaba di sele, selo se a kaileng fa se sa siama ka bana ba tshwanetse go kaelwa tsela le tsamaiso ya ngwao.

A re gape maikaelelo a gagwe e ne e le go bopaganya batho le go rotloetsa ngwao ya Sekalaka.

Rre Totego o rotloeditse dikgaisano tseo ka P20 000 fa Rre Ketan a ntshitse P10 000, Rre Justice Mojanaga a ntsha P5 000.

Mo kgaisanong ya mmino wa dipina tsa dinnoto, setlhopha sa Karana go tswa kwa kgotleng ya Selolwane se ne sa gapa maemo a ntlha se latelwa ke sa Tidimalo, maemo a boraro ya nna setlhopha sa Lembelekakwedamba.

Setlhopha sa Selolwane Traditional se ne sa gapa maemo a ntlha mo mminong wa Setswana wa Ndasula.

Bafenyi ba maemo a ntlha ba ne ba fiwa P2 500, a bobedi P2 000 fa a borararo e ne e le P1 500. BOKHUTLO