04 Jan 2018

Kgosi Tapson Madikwe wa kgotla ya Tutume o akgoletse maloko a setlhopha sa kgwele ya dinao sa Goledzwa le balatedi ba sone tiro e ntle e ba e direlang morafe.

Kgosi Madikwe o ntshitse kakgolo eo ka letsatsi la go abela madi komiti ya leobo la kgotla ya Tutume bosheng.

A re maloko a komiti eo ya Goledzwa a itshupile fa a na le boikarabelo mo setshabeng ka e sale fa go simololwa kago ya leobo leo ba tsentse letsogo ka go ntsha madi ngwaga le ngwaga.

O ne a ba opela legofi a re ba botlhale e bile ba ka tlhabolola motse.

Tona wa merero ya setshaba, boagedi le tsa bong, Rre Edwin Batshu a re ke banana ba ntlha go tswa ka mogopolo wa go nna jalo mo Tutume e bile ba gaisitse ba le bantsi.

Rre Batshu o ne a gatelela ka go re maiteko a bone a tsamaelana le matshego a ga Tautona. 

O bolela fa maloko a setlhopha seo ba ipetletse tsela e motlhala wa bone o bonwang le ke difofu tota, selo se se tlaa nnang mo dipelong tsa batho ba Tutume ka dinako tsotlhe.

Modulasetilo wa komiti ya Goledzwa, Rre Edmond Molefe o ne a bolela fa ba setse ba abetse komiti ya leobo P14 500 fa e sale go simololwa kago ya leobo go fitlha gompieno.

Rre Molefe a re maikaelelo a bone ke go tshwaragana le bogogi jwa motse go tlhabolola motse, a kopa ba komoti ya ditlhabololo tsa motse go tla ka sengwe se se tlaa dirwang gore ba kgone go ba thusa gape. BOKHUTLO