11 Dec 2017

Batshameki ba metshameko e e farologanyeng, kwa Lobatse ba phatlaletse le dikole go ikatisetsa metshameko ya Botswana Games e e tshwarelwang kwa Gaborone kgwedi eno.

Mookamedi batshameki bao, Mme Gothaang a re le fa go ntse jalo go na le dikgwetlho di akaretsa letlhoko la madi le go reka didirisiwa.

E rile a ema batshameki ka lefoko kwa phatlalatsong ya bone, mothusa mmatoropo wa Lobatse, Rre Francis Mokwena, a re ba tshwanetse go supa tsotlhe tse di tlhokiwang gore ba tsenelele metshameko eo, mme ba seka ba leka maretshwa.

A re ba tlogele dikgang tsa go ngongorega ka go re ba tsieditswe, a tlatsa ka go re go tlhokega boitshwaro jo bo amogelesegang.

A re ba seka ba tsaya dikgang tsa metshameko ka mafatlha.

A re se se ka ba thusa gore ba iphitlhele ba le mo maemong a botlhano go ya kwa godimo fa ba itshwara sentle.

Mo go tse dingwe, Rre Mokwena o gakolotse batshameki gore motshameko mongwe le mongwe o na le tiriso mafoko ya one.

A re boitshwaro jo bo amogelesegang ke tsela e motho a dirang dilo ka yone le ka fa a di tsibogelang ka teng.

A re ba somarele nako, gape ba seka ba batlwa ba je ka nako e e beilweng botlhe e le setlhopha.

A re gore ba fenye ba seka ba ikala, ba robale ka nako gape ba ikhutse gore ba kgone dikgaisanyo.

Constable Charles Ntema go tswa kwa sepodising sa Botswana a direla kwa Woodhall, o boletse gore go nna motshameki go siame ka gore puso e a huhega go bona ngwana yo o batlang go gola sentle a senyediwa bokamoso kgotsa a kgorelediwa ke dilo di tshwana le diritibatsi, a bolela gore di senya dilo tsotlhe tse dintle.

A re motshameki ga a a tshwanela go ipha maatla ka dilo tse di sa siamang, fa a dira jalo o tlaa bo a senya botshelo jwa gagwe. O ba kopile go ikgapha mo tirisong diritibatsi.

Constable Ntema a re diritibatsi di dira gore ba tswe mo tseleng kgotsa ba dire dilo tse dimaswe mme a tlatsa ka go re dikatlholo tsa teng di gagametse.

Mme Onnetse Malope go tswa kwa lephateng la tlhabololo banana, metshameko le ngwao, o ne a leboga ba-tsaya karolo jaaka baithuti le lephata la thuto, khamphani ya Flo Tek e e sa iponeng tsapa mo go rotloetseng metshameko e.

O boletes gore le ngwagatlola ba ne ba ntse ba rotloetsa.
Mo go tse dingwe, Mme Malope o lebogile khansele ya toropo ya Lobatse a re e dirile tse dintsi, BNSC, All-Kasi e e ntshitseng dipaka tsa metshameko di le pedi, Shakes Fitness Centre le ba bangwe.

A re ba tswelele ka mowa oo wa go batla go bona toropo e phaphasela ka boitumelo.

Team Lobatse e tsamaya ka batshameki ba metshameko e e farologaneng go akaretsa kgwele ya dinao, bolo-tloa, karate, mabole, badmanton, basketball, go shapa, mabelo le morabaraba. BOKHUTLO