28 Nov 2017

Mogolwane wa thuto mo kgaolong ya Borwa, Rre Ndineni Mbuso a re go botlhokwa gore lephata la thuto le ikamanye thata le setshaba.

Rre Mbuso o buile jaana jaaka lephata la gagwe le ne le phepafatsa gammogo le go abela morafe wa Selokolela diaparo le ditlhako kwa kgotleng ka Labotlhano.

A re gore thuto e nne ya boleng jo bo rileng, kgolagano le tirisano mmogo ya bodiredi jwa lephata la thuto le morafe ke konokono.

A re e le ba lephata la thuto ba ikemiseditse go lekola le go dirisanya mmogo le metse yotlhe e e mo kgaolong.

Kgosana wa tetlanyo mo Selokolela, Rre Botshelo Legabala e rile a ntsha la gagwe, a leboga go menaganye go bo ba filwe dimpho.

A re seo se supa gore le bone ba a gopolwa, a re go tlhola ba phepafatsa motse le ba lephata la thuto ke sebaka se ba tlaa nnang ba se gopola ka dinako tsotlhe.

Fela Rre Lebogang o ne a kopa gore dimpho tseo tse di roletsweng mo kgotleng, e re fa di kgaoganngwa morafe go nne le kemedi go tswa mo baabing ba tsone gore ba itse gore di kgaogantswe jang.

Mogolwane wa thuto go tswa kwa kgaolong-potlana ya Kanye Administrative Authority, Rre Kinstern Kedumele ene e rile a ntsha la gagwe, a kopa magosi gore ba sale ba tlhomamisa gore dilwana di a kgaoganngwa.

O bile a kopa gore mowa wa neelano o nne teng fa dilwana di kgaoganwa, a tlatsa ka go re go molemo gore mmaboipelego wa kgaolo a nne teng.

A re diaparo tseo le ditlhako di ne di ajwa ke badiri ba lephata la thuto gammogo le barutabana ba dikole tse di mo Kanye.BOPA