22 Nov 2017

Maitiso a dibente tsa masole a Botswana Col Baboloki Mogotsi a re  tshologelo e ne e le e e kwa godimo kwa maitisong a bone kwa Orapa.

Fa a bua mo potsolotsong le BOBA, Modulasitilo wa setlhopha seo o supile fa  maitiso a o a atlegile ka jaana dipalo di ne di  fetile seelo se ba neng ba se ipeetse.

Col Mogotsi o tlhalositse fa maitiso a a simologile ka 1991  e le moono wa ga Tautona Lt Gen. Dr Seretse Khama Ian Khama yo ka nako eo a neng a le  moeteledipele wa sesole.

Col Mogotsi a re maikaelelo a maitiso ke go kgobokanya madi  go thusa batho ba ba tlhokileng lesego mo setshabeng, mekgatlho  le makgotla a bopelotlhomogi.

O tlhalosa fa maikaelelo a maitiso gape e le  go isa sesole sa Botswana kwa setshabeng.

A re gape ba supa bokgoni le botswerere jwa bone kwa sesoleng  sa Botswana ka meopelo le mebino ka go farologana.

Col Mogotsi a re maikaelelo a bone ke go tswelela ba tshwara maitiso a ngwaga le ngwaga mo mafelong ka go farologana.

O ne a supa gape gore Orapa ke lefelo la bobedi ba tshwara maitiso a mono ngwaga  mo go lone.

O tlhalosa fa ba simolotse kwa Gaborone.

Cornel Mogotsi a re gongwe le gongwe fa ba tshwarang maitiso a teng, ba abela bangwe ba makgotla kana mekgatlho ya  bopelotlhomogi madi.

Ba ne ba abela mokgatlho wa Bomme wa Botswana Council of Women wa Letlhakane P25 000. BOKHUTLO