02 Nov 2017

Kgosi Serai Esterhuizen wa Bokspits kwa kgaolong ya Kgalagadi Borwa o tlaa fitlhiwa kamoso kwa Bokspits.

Mme Leetjie Dekock yo e leng mongwe wa ba losika, o tlhaloseditse BOPA fa Kgosi Esterhuizen a tlhokafetse Phalane a le 25 kwa Princess Marina kwa Gaborone morago ga go lwala ka lobaka lo loleele.

Mme Dekock o tlhalositse fa Kgosi Esterhuizen yo o tlhokafalang a le dingwaga di 73, a simolotse tiro ya gagwe ya bogosi e le kgosi e e sekisang ka 1981, mme a tlhatlosiwa maemo go nna kgosi e kgolwane, maemo a a tlhokafalang a a tshegeditse.

O kaile fa Kgosi Esterhuizen yo o neng a eteletse pele morafe o o tlwaelesegileng ka go bidiwa makhalathe a ne a rata tiro ya gagwe, a e dira ka botlhaga, botswerere, boineelo le lorato, a re o kile a tlhophiwa go ya go nna moemedi wa Kgalagadi kwa Ntlong ya Dikgosi ka 2010. BOPA