25 Oct 2016

Modulasetilo wa komiti ya ditlhabololo ya Makalamabedi mo kgaolong ya Boteti Bophirima,  Rre Morris Gwandu, o kopile gore ba okelediwe dipalo tsa babereki ba lenaneo la Ipelegeng go nna 150.

Rre Gwandu o kopile jalo kwa phuthegong ya kgotla e e neng e buisiwa ke mopalamente wa Boteti Bophirima yo gape e leng tona wa dikgaolo le tlhabololo magae, Rre Slumber Tsogwane bosheng.

Rre Gwandu a re ba itemogela dipalo tse dintsi tsa batho ba ba batlang go tsena mo lenaneong la Ipelegeng ka nako ya phiro ya lenaneo leo.

A re  dipalo tse dintsi tse di bakiwa ke  letlhoko la ditiro le le amileng bagolo le banana a tlhalosa gore banana ba ba sa dirang sentle mo lekwalong la boraro le la botlhano ke bone ba oketsang dipalo tsa baikopedi ba lenaneo le.

Modulasetilo o ne a supa matshwenyego a mangwe a bone a re ba sale ba solofeditswe tliliniki ya koloi (mobile clinic) a re ba dirisa kokelano e e kwa  moseja, ko sekoleng se segolwane ba batla go okeletswa matlwana a borutelo,matlo a babereki ,ofisi, ntlo ya boapeelo le matlo a a boroko jwa baithuti ka go le mosuke.

Rre Gwandu a re ko sekoleng se sebotlana ba batla lekalana le le faphegileng la bana ba banalebogole le mochine o o ntsifatsang dipampiri.

O ne gape a supa gore ba tshwenngwa ke seemo se barutabana ba ba fudusitsweng  go tsewa sebaka gore ba emisetswe.

Raboipelego mogolo wa kgaolo ya Boteti,  Rre Victor  Thake o ne a re ga ba kake ba kgona go oketsa dipalo tsa ipelegeng mo nakong eno  ka ntata ya tlhaelo ya madi.

Rre Thake a re  lenaneo la Ipelegeng ke la nakwana ka jalo ga ba rotloetse gore banana ba ba sa dirang sentle kwa dikoleng ba itie ka lone.

O ne a kopa batsadi go tsaya boikarabelo jwa go rotloetsa bana go dirisa  mananeo a bo BOCODOL le a mangwe go tokafatsa maduo a bone a thuto.

Tona o ne a ba lekodisa ka tse di builweng ko palamenteng e e fetileng di akaretsa molao wa maloma tsebe, wa mochine wa ditlhopho le gore ba amogetse tebelopele e ntsha ya 2036. BOKHUTLO