03 Oct 2016

Monana wa Mathathane, Rre Jan Moshokwa wa kompone ya Junction Electrical, o abetse motse wa gagwe P15 000 ka letsatsi la boipuso.
Fa a ntsha madi ao ka letsatsi la bopiuso kwa kgotleng ya Mathathane, Rre Moshokwa o rotloeditse banana bogolo jang go ema ka dinao go tlhabolola motse wa bone.
Rre Moshokwa a re  ditlhabololo  mo motseng wa Mathathane di ka bonala fa go rena mowa wa bojammogo le kutlwano mo morafeng.
A re banni ba tshwanetse go tswa ka megopolo le methale e ba ka e dirisang go kokoanya madi a a ka dirisiwang mo ditlhabololong.
Rre Moshokwa o itlamile go gokela poso ya motse oo motlakase gore ditlamelo di goroge sentle mo banning ba motse wa Mathathane  le tikologo.
Mo  godimo ga madi a a a ntshitseng, Rre Moshokwa o reketse kgotla ya Mathathane ditena di le dikete tse pedi tse di tla dirisiwang go aga leobo la kgotla.
Rre Moshokwa o itlamile go ntsha  P30 000 yo o tlaa  dirisiwang  mo ipelelong boipuso jwa ngwaga oo tlang wa 2017. BOKHUTLO