07 Apr 2024

Mopalamente wa kgaolo ya Good Hope-Mabule Rre Eric Molale o kopile morafe wa Barolong go thusa puso go gasa melaetsa ya ipabalelo tseleng ka maikaelelo a go fokotsa dikotsi tsa tsela.

Rre Molale o buile se kwa merapelong ya batho ba ba tlhokafetseng mo kotsing ya bese kwa Mamatlakala kwa Limpopo, Afrika Bokwa ka tshimologo ya malatsi a paseka.

A re nako e gorogile ya gore morafe o simolole go bereka le puso go thusa go hema dikotsi.

Modulasetilo wa khansele ya Good Hope Rre Fanki Motsaathebe a re kotsi e, e amile botlhe segolo jang ka e gapile matshelo a batho ba le bantsi.

O kopile puso go netefatse fa gona le dikoloi tsa thuso ya potlako mo kgaolong, are nako tse dingwe motho o kgona go latlhegelwa ke botshelo ka go sena thuso e e tlhokegang.

Mongwe wa batsena merapelo,  Mme Kelebogile Tsholofelo o supile fa go tla a tsaya nako gore ba masika le ditsala ba gomotsege, mme a supa fa thapelo ele yone fela eka ba sidilang maikutlo. BOKHUTLO