16 Mar 2021

Tona wa Merero ya Ofisi ya ga Tautona, Tsamaiso Puso le Bodiredi, Rre Kabo Morwaeng a re Batswana ba tshwanetse ba lemoge gore go fokodiwa ga dipalo kwa kerekeng ga se kotlhao mo badumeding.

Fa a araba potso kwa Palamenteng ka Mosupologo, Rre Morwaeng o kopile ope fela gore a amogele gore ga go kake ga tlhola go nna le tshwetso e e itumedisang batho botlhe ka nako e le nngwe, bogolo jang ka gore tse dingwe di ama kgololesego ya batho e ba e filweng ke molao-motheo wa lefatshe leno.

“Ka moo, re lopa gore a rotlhe re amogele gore se setona ke go somarela botsogo le matshelo a batho.” 

Rre Morwaeng o ne a tlhalosa gore puso e tsaya tumelo ka tlhoafalo.

A re puso e rerisana le baeteledipele ba badumedi gangwe le gape, bogolo jang ka nako eno ya COVID-19.

Fa a tswelela ka tshwetso ya go fokoletsa palo ya masome a matlhano, Rre Morwaeng o ne a tlhalosa gore e tserwe go lebilwe go gola ga dipalo tsa bolwetse mo Botswana ka bophara ka Ferikgong.

O ne a tlhalosa fa go ne go lebilwe gore kokoano ya batho ka kakaretso e oketsa kgonagalo ya kanamo.

A re seemo seo se tshwenya bogolo thata fa go kokoane batho ba ba itsaneng, jaaka diphuthego tsa kereke.

Mo ntlheng e nngwe, Rre Morwaeng o ne a tlhalosa fa dipagamo tsa setshaba di dirisiwa thata ke batho ba ba sa itsanyeng, mme ka moo a re go ba tlhotlheletse go obamela melawana ya go tila kanamo, ka moo palo tsa bapalami di ne tsa okediwa.

Rre Morwaeng o ne a tlhalosa fa go ngotla dipalo tsa kereke e ne e se tshwetso e e bonolo ka gore matshelo a batho a a amega, mme le fa go ntse jalo a re Batswana ba tshwanetse go amogela gore go boloka matshelo go tla pele.

Rre Morwaeng o ne a re puso e itemogela gore kereke le tumelo ka kakaretso ke konokono mo go ageng maitsholo a batho le mo ntweng kgatlhanong le COVID-19 tota, a tlatsa ka go re kereke gape e aga motho, mme a re go fokodiwa ga dipalo go ngotlile seabe sa kereke mo dintlheng tseo.

O bile a tlhalosa fa kereke ka bo yone e amegile ka gore ditiro dingwe tsa yone di tlhoka dipalo tse di rileng gore di kgonagale, mme ka moo a re dingwe tsa ditiro ga di kgonagale, ka mabaka a palo potlana.

O ne a re le fa go nna le madiadia, puso e tlaa tswelela e rerisana le makgotla a badumedi.

“Re lemoga e bile re amogela botlhokwa jwa therisanyo le go bopa mogopolo mo dikganneng tse di tlhokang morero,” ga latlhela Rre Morwaeng.

Mopalamente wa kgaolo ya Ghanzi Borwa, Rre Motsamai Motsamai o ne a batlile go itse gore go ne go lebeletswe eng fa puso e tlaa tsaya tshwetso ya go fokotsa dipalo kwa dikerekeng, mme dibese tsa setshaba tsone di okelediwa pabagami mo mesepeleng e metelele.

Rre Motsamai a re kereke ke ya batho ba bantsi, ka jalo dioura tse pedi di dinnye, gape o ne a kopa go itse gore puso e dira go le kae go resisa badumedi ka phokotso ya bakereki le dinako kwa kerekeng. Bokhutlo