18 Aug 2019

Kgosi Polson Keithaganetse wa Mmea kwa Boteti Botlhaba o lebogetse ditlhabololo kwa motseng wa gagwe.

Kgosi Keithaganetse o lebogile jaana kwa phuthegong ya kgotla e e neng e buisiwa ke mopalamente wa kgaolo, Rre Sethomo Lelatisitswe bosheng.

A re selelo sa bone sa motlakase go lebega se tlaa kgaotsa ka  Botswana Power Cooperation e setse e dirile motlhala.

A re  ba mo leubeng ka ntlha ya ditlou tse di ba fudusitseng  kwa masimo, a  tlhalosa fa banni  ba dira maiteko a go lema gore ba itirele dijo mme  ba tswe ba iphotlhere ka  ntata ya tshenyo ya ditlou.

Se se bothoko  a re ke gore badiri ba lephata la diphologolo ga ba tsibogele mokgosi wa bone fa ba senyeditswe ke diphologolo, go twe ga go na dikoloi.

Kgosi Keithaganetse  a re ba sale ba begetse ba lephata la diphologolo ka tshenyo  ya masimo, nako kgolo ke eno.

O ne gape a re o tshwengwa ke kgang ya  go  sielwa metsi ka koloi, a botsa gore ke eng  go sa baakanngwe diphaephe tsa metsi.

Fa a tlatsa kgosi, modulasitilo wa komiti ya ditlhabololo tsa motse, Rre Mothabi Maduma o ne a supa fa ditlhabololo di tsweletse e bile di fetotse selebego sa motse.

Modulasitilo a re Ipelegeng  ke yone  tiro fela mo motseng mme dipalo tse ba di filweng ga di a lekana.

E rile a ba lekodisa ka palamente,  Rre Lelatitswe a re  Tautona, Dr Mokgweetsi Masisi a re o batla go bona khumo ya lefatshe leno e boela mo diatleng tsa Batswana, a dira jalo ka go tlhofofatsa dikgang tsa go bula dikgwebo.

Rre Lelatisitswe a re Tautona o ne a roma maphata a a amegang kwa setshabeng, go sekaseka tse e leng dikgoreletsi.

Mopalamente a re mengwe  melao e tlhofofaditse tse di neng di dira dilo thata mme a ba rotloetsa  go e dirisa  go tlhabolola matshelo a bone.

Mokhanselara wa Mokubilo/Mmea, Rre Phankgi Resetse a re batho ga ba sa tlhole ba kgona go bapala di-tsa naga ka ntata ya ditlou tse di ba tshidisetsang mo letshogong.

O kopile gore lephata la diphologolo le tsiboge ka dipula di tloga di phaila ba sa bona tshenyo, bosupi bo be bo nyelela. BOKHUTLO